Mahir Xələfli 8 aprel 2001-ci ildə Sumqayıt şəhərində dünyaya göz açıb. Onun ailəsi Qubadlı rayonunun Qiyaslı kəndindəndir və 1980-ci ildə “Gənclik şəhəri”nə pənah gətirərək talelərini bu şəhərlə bağlayıblar. Mahir orta təhsilini Sumqayıtda yerləşən Qubadlı rayonu B.Mehdiyev adına 2 saylı tam orta məktəbdə alıb. 2017-ci ildə 9-cu sinfi bitirdikdən sonra, təhsilini Abşeron rayonunun Ceyranbatan qəsəbəsindəki 197 saylı Peşə Liseyinə verib. 2020-ci ildə liseyi bitirib. Kiçik yaşlarından Mahir idmana hədsiz maraq göstərib. "Polad", "Zirvə" idman klublarının üzvü olan Mahir 2010-2020-ci ilin fevralınadək olan müddət ərzində şəhər və respublika yarışlarında böyük həvəslə iştirak edərək, bir çox nailiyyətlərə imza atır. Qazandığı uğura görə Fəxri Fərman, diplom, medal və hədiyyələrlə mükafatlandırılır.
Səfərbərlik və Hərbi Xidmətə Çağırış üzrə Dövlət Xidmətinin Sumqayıt Şəhər İdarəsi tərəfindən "Çağırış" vəsiqəsi alan Mahir iyulun 9-u 2020-ci ildə Vətən qarşısında borcunu yerinə yetirmək üçün həqiqi hərbi xidmətə - Gəncə şəhərində yerləşən "N" saylı hərbi hissəyə yola düşür. Andiçmə mərasimindən sonra 14 sentyabr tarixində o, Daşkəsənə, Xoşbulaq kəndindəki "N" saylı hərbi hissəyə göndərilir.
2-ci Qarabağ müharibəsi başlayan gün - sentyabrın 26-dan 27-nə keçən gecə Azərbaycan Ordusunun 19 yaşlı cəsur əsgəri Mahir Xələfli Murovdağ istiqamətində gedən döyüşlərdə qəhrəmancasına şəhid olur.
Qürur yerimiz olan 19 yaşlı şəhidimizin nəşi 27 sentyabrda doğulub boya-başa çatdığı Sumqayıt şəhərinə gətirilir və 28 sentyabr 2020-ci il tarixində Sumqayıt Şəhidlər xiyabanında torpağa tapşırılır.
Azərbaycan Silahlı Qüvvələrinin məğrur, qeyrətli, qorxmaz döyüşçüsü 19 yaşlı əsgər Mahir Muxtar oğlu Xələfli ölümündən sonra Azərbaycan Respublikasının Prezidenti İlham Əliyevin müvafiq Sərəncamlarına əsasən "Vətən uğrunda" və "Kəlbəcərin azad olunmasına görə" medalları ilə təltif olunub.
2021-ci ildə Sumqayıt şəhəri 1 saylı İnternat tipli Liseydə, TET Gimnaziyada və 9 saylı tam orta məktəbdə bir sinfə şəhidimizin adı verilib.
