Sumqayıt Tibb Mərkəzi (STM) “Tibb bacısı və mamalığın gücləndirilməsi üzrə Azərbaycan Simpoziumu”nda təmsil olunub. Bu haqda 15 dekabr tarixində Sumqayıt24 xəbər verir.
Bakıda keçirilən konfransa STM-in 30-a yaxın tibb bacısı qatılıb. Tibb bacısı və mamalar, elm adamları, tələbələr və qərarverici şəxslərin iştirakı ilə panel müzakirələr, forum və təlim kursları keçirilib. STM Tibb bacıları şöbəsinin rəhbəri Qızılgül Bünyatova Məsləhət Komitəsi üzvü seçilib.
"Ailə planlaşdırılması və patronaj tibb bacısının rolu", "Xəstə təhlükəsizliyini əsas götürən parenteral dərman tətbiqi", "Hamilələrdə fetal ürək səslərinin qiymətləndirilməsi", "Doğuş zamanı sübuta əsaslanan təcrübələr" və s. təlimlərdən sonra tibb bacılarına sertifikatlar verilib.
Qeyd edək ki, simpozium ÜST-nin Azərbaycan nümayəndəliyi tərəfindən Səhiyyə Nazirliyi, İcbari Tibbi Sığorta üzrə Dövlət Agentliyi (İTSDA) və TƏBİB-lə əməkdaşlıq çərçivəsində təşkil olunub.
