Yenilənib saat 15:30
Saray bağları ərazisində sakinlərin həyətinə daxil olan ayı balası polis əməkdaşları tərəfindən Ekologiya və Təbii Sərvətlər Nazirliyinin əməkdaşlarına təhvil verilib. Bu haqda Report.az-a istinadən xəbər veririk.
Bioloji Müxtəlifliyin Qorunması Xidmətinin rəisi Firuddin Əliyevin sözlərinə görə, ayı Altıağac Milli Parkının nəzdində fəaliyyət göstərən Vəhşi Təbiətin Bərpası Mərkəzi və Reabilitasiya Klinikasında bir müddət reabilitasiya keçdikdən sonra vəhşi təbiətə buraxılacaq.
Saat 14:00
Sumqayıtlı incəsənət adamının bağ evinə ayı girib. Sumqayıt24 bu haqda 4 iyun tarixində Oxu.az-a istinadən xəbər verir.
İnsident səhər saatlarında, bəstəkar-müğənni Murad Arifə məxsus evin bağında qeydə alınıb. O, bununla bağlı fikirlərini bildirib:
“Mənim həyatımda bir tək ayı çatışmırdı. Səhər saat 5-in yarısı həyətimizə ayı balası qonaq gəlmişdi. Bala olmasına baxmayaraq, Marsın (itini nəzərdə tutur-red.) setkasına cumur, yaxınlaşanlara hücum edirdi. Bağımızda yaşayan ailə gecə ilə videoya çəkib göndərib. Yatmışdım, indi xəbər tuturam. Ayı da hasardan qaçıb gedib. Xatırladıram ki, Novxanı-Qurd dərəsi zonasında ayılar olmur. Bu, kiminsə kəsilib, yemək üçün saxladığı heyvan imiş, qurtulub”.
