Sumqayıtda “Atalar Məktəbi - Məsuliyyətli Atalığa Doğru” layihəsinin açılış mərasimi keçirilib. Sumqayıt24-ə bu barədə bu gün, 4 avqust tarixində məlumat verilib.
Açılışda BMT-nin Əhali fondunun Azərbaycan nümayəndəliyinin əməkdaşları Səbinə Manafova və Nailə Cəfərova, Gənclər və idman nazirliyinin gənclərlə iş sektorunun müdiri Nərmin Aslanbəyli, eləcə də icra nümayəndələri iştirak ediblər. Ümumilikdə 119 nəfərin qatıldığı tədbir “Ailə münasibətləri” və “Ailə planlanması” mövzularında təlim sessiyası ilə müşayiət olunub.
“Atalar Məktəbi - Məsuliyyətli Atalığa Doğru” layihəsi çərçivəsində gənc atalar və ata olmağa hazırlaşan şəxslər üçün iki ay ərzində, hər həftənin şənbə günü, saat 11:00-da təlimlər təşkil olunacaq. Ünvan - Gənclər Evi (5-ci mikrorayon).
Layihəyə qoşulmaq üçün anketi (cutt.ly/0KAhD3G ) dolduraraq və ya (070) 504-45-47 nömrəsi ilə əlaqə saxlayaraq qeydiyyatdan keçmək tələb olunur.
“Atalar Məktəbi - Məsuliyyətli Atalığa Doğru” layihəsi Avropa İttifaqının maliyyə dəstəyi ilə
həyata keçirilən proqramlar çərçivəsində BMT-nin Əhali Fondu (UNFPA), BMT-nin Qadınlar üzrə Agentliyi (UN Women), Əmək və Əhalinin Sosial Müdafiəsi Nazirliyi, Gənclər və İdman Nazirliyi və Ailə, Qadın və Uşaq Problemləri üzrə Dövlət Komitəsinin birgə təşkilatçılığı, “Gender Hub Azerbaijan” sosial platforması və “Azərbaycan Maarifçilər Assosiasiyası” tərəfindən icra olunur.
