Sumqayıtlı kadra yüksək vəzifə verilib. Sumqayıt24 bu haqda 13 yanvar tarixində Report.az-a istinadən xəbər verir.
Daxili İşlər Nazirliyinin (DİN) Baş İctimai Təhlükəsizlik İdarəsinin rəisi vəzifəsinə təyinat olub. Nazir Vilayət Eyvazovun əmri ilə vəzifəyə general-mayor Sərdar Səfərov gətirilib.
Sərdar Səfərov bu təyinata qədər Bakı Şəhər Baş Polis İdarəsi rəisinin xidmət üzrə müavini olub.
Qeyd edək ki, yeni rəis 1973-cü ildə Sumqayıt şəhərində anadan olub. Azərbaycan Dövlət Bədən Tərbiyəsi İnstitutunu, Türkiyə Respublikasının Jandarma Zabitlər Məktəbini və DİN-in Polis Akademiyasını bitirib.
O, 1996-cı ildən 2005-ci ilin avqust ayınadək Daxili Qoşunlarda xidmət edib və bu müddət ərzində müxtəlif məsul vəzifələrdə işləyib. O cümlədən DİN-in Daxili Qoşunlarının hərbi hissələrində Motorlaşdırılmış Alayın Xüsusi təyinatlı bölüyünün komandiri, Xüsusi Motorlasdırılmış Alayın Xüsusi təyinatlı taborunun komandirinin müavini-qərargah rəisi vəzifələrində xidmət edib.
2005-ci ildən daxili işlər orqanlarında xidmətə başlayıb, o cümlədən bölük komandirinin müavini, bölük komandiri vəzifələrini, 2019-2022-ci illərdə Bakı Şəhər Baş Polis İdarəsinin İctimai Təhlükəsizlik İdarəsinin rəis müavini və rəisi vəzifələrini tutub.
Prezident İlham Əliyevin 01 iyul 2022-ci il tarixli Sərəncamı ilə ona polis general-mayoru xüsusi rütbəsi verilib.
Ölkə başçısı tərəfindən “Hərbi xidmətlərə görə”, "İgidliyə görə" və “Vətən uğrunda” medallarına layiq görülüb.
Sərdar Səfərov ailəlidir, 3 övladı var.
