"Tarix yazanlar" layihəsinin buraxılışı kapitan Vüsal Şabanova həsr edilib. Sumqayıt24 bu haqda 3 noyabr tarixində Azxeber.com-a istinadən xəbər verir.
Vüsal Şabanov 1984-cü ildə Sumqayıt şəhərində anadan olub. Cəmşid Naxçıvanski adına hərbi liseyi bitirdikdən sonra Heydər Əliyev adına Ali Hərbi Məktəbə daxil olub. Daha sonra isə leytenant rütbəsi ilə ön cəbhəyə xidmətə yollanıb.
O, Aprel döyüşlərində və Vətən müharibəsində savaşıb. Ağdərə istiqamətində düşmənin basdırdığı minaya düşüb. Sol ayağının 1/3 hissəsini itirdiyi üçün protezlə təmin olunub.
Kapitan bildirir ki, ordumuzun döyüş qabiliyyəti Ermənistan ordusundan hər zaman üstün olub. Təxribata əl atan düşmən ordusunun cavabı layiqincə verildi: “Şəhidlərimizin olması, şəxsi heyətdən olan itkilər komandir kimi mənə də pis təsir edirdi. Döyüş yoldaşını itirdiyi üçün insan sarsılırdı. Ancaq işğal altında olan torpaqları azad etdikcə, balanslaşdırılmış bir əhvali-ruhiyyə yaranırdı.
“Kimin itkisi sizə daha çox təsir etdi?” sualına isə o, belə cavab verib:
“Bütün döyüş yoldaşlarımızın itkisi mənim üçün ağırdır. Onların hansı şəraitdə və necə şəhid olmaqlarını deyə bilmirəm, dilimə gətirə bilmirəm. İstəməzdim onları itirim. Sizinlə danışdıqca həmin səhnələr gözümün önündə canlanır”.
Qazimiz prezident İlham Əliyev tərəfindən mənzil və avtomobillə mükafatlandırılıb. Mənzil təqdim olunan zaman Prezident onun ayağı, protezin rahat olub-olmaması ilə maraqlanıb.
Qeyd edək ki, hazırda Vüsal Şabanov rahat şəkildə idman edir, futbol oynayır. Məşğulluq marafonu çərçivəsində özəl şirkətlərin birində işlə də təmin edilib.
"Tarix yazanlar" layihəsi QHT-yə Dövlət Dəstəyi Agentliyinin yardımı ilə “Gənclərin Sosial İqtisadi İnkişafına Yardım” İB tərəfindən həyata keçirilir.
