Bu gün sumqayıtlı şəhidin anım günüdür.
Sumqayit24.az xəbər verir ki, şəhid Anar Heydərov 1 iyun 1988-ci ildə Sumqayıt şəhərində anadan olub.
O, 2006-cı ildən Azərbaycan Silahlı Qüvvələrinin sıralarında zabit idi. 2016-cı ilin Aprel döyüşlərində Anar Heydərov da yaxından iştirak edib.
Azərbaycan Ordusunun kapitanı olan Anar Heydərov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində iştirak edib. Suqovuşanın azadlığı uğrunda gedən döyüşlərdə vuruşub. Anar Heydərov 3 oktyabr 2020-ci ildə Tərtər rayonunun Suqovuşan qəsəbəsində döyüş tapşırığının yerinə yetirilməsi zamanı şəhid olub.
Azərbaycan Prezidenti İlham Əliyevin Sərəncamına əsasən, Anar Heydərov ölümündən sonra "Vətən uğrunda", "Suqovuşanın azad olunmasına görə" medalı və III dərəcəli "Rəşadət" ordeni ilə təltif edilib.
