Bu gün sumqayıtlı şəhidin anım günüdür.
Sumqayit24.az xəbər verir ki, Azərbaycan Silahlı Qüvvələrinin mayoru olan Taleh Adil oğlu Kərimov 1985-ci il martın 6-da Sumqayıt şəhərində anadan olub. 2003–2007-ci illərdə Heydər Əliyev adına Azərbaycan Ali Hərbi Məktəbində (AAHM) "Kəşfiyyatçı" ixtisası üzrə hərbi təhsil alıb.
2007-ci ilin iyun ayından 2008-ci ilin iyun ayına qədər Azərbaycan Silahlı Qüvvələrinin Təlim və Tədris Mərkəzində "Zabit" ixtisası üzrə təlimlərdə iştirak edən Taleh Kərimov 2008-ci ildən Azərbaycan Ordusunda xidmət etməyə başlayıb.
Müxtəlif illərdə müdafiə nazirinin əmrləri ilə 2-ci və 3-cü dərəcəli "Qüsursuz xidmətə görə", Azərbaycan Silahlı Qüvvələrinin 90 və 95 illiyi, həmçinin "Azərbaycan Ordusunun 100 illiyi" yubiley medalları ilə, habelə fəxri fərmanlarla təltif edilib.
2020-ci il sentyabrın 27-də başlanan Qarabağ müharibəsi zamanı Cəbrayılın, Füzulinin və Qubadlının azad edilməsi uğrunda gedən döyüş əməliyyatlarına hərbi hissənin kəşfiyyat bölməsinin rəisi vəzifəsində qatılıb. Oktyabrın 30-da Qubadlı rayonu istiqamətində döyüş tapşırığının icrası zamanı şəhid olub. Sumqayıt Şəhidlər Xiyabanında dəfn olunub.
Prezident İlham Əliyevin Sərəncamlarına əsasən, Taleh Kərimov ölümündən sonra "Qarabağ" ordeni, "Vətən uğrunda", "Qubadlının azad olunmasına görə", "Cəbrayılın azad olunmasına görə", "Füzulinin azad olunmasına görə" medalları ilə təltif edilib.
