Bu gün sumqayıtlı Vətən Müharibəsi Qəhrəmanının anım günüdür.
Sumqayit24.az xəbər verir ki, şəhid Adil İbrahimli 9 sentyabr 1992-ci ildə Sumqayıtda anadan olub. 1999-2008-ci illərdə Sumqayıt şəhərində 14 nömrəli tam orta məktəbdə, 2008-2011-ci illərdə isə Cəmşid Naxçıvanski adına Hərbi Liseydə təhsil alıb. 2011-2015-ci illərdə Heydər Əliyev adına Azərbaycan Ali Hərbi Məktəbində (AAHM) ali hərbi təhsil alıb. Ailəli idi. 2 övladı yadigar qalıb.
Azərbaycan Ordusunun Xüsusi Təyinatlı Qüvvələrinin baş leytenantı olan Adil Asəm oğlu İbrahimli 2020-ci ilin 27 sentyabrında başlanan Vətən müharibəsi zamanı Murovdağın, həmçinin Cəbrayıl, Füzuli, Hadrut, Xocavənd və Şuşanın azadlığı uğrunda gedən döyüşlərdə savaşıb və noyabrın 7-də Şuşanın azad edilməsi zamanı qəhrəmancasına şəhid olub.
Prezident İlham Əliyevin müvafiq Sərəncamlarına əsasən, Adil İbrahimli "Vətən uğrunda", "Kəlbəcərin azad olunmasına görə", "Xocavəndin azad olunmasına görə", "Şuşanın azad olunmasına görə", "Cəbrayılın azad olunmasına görə" və "Vətən Müharibəsi Qəhrəmanı" medalları ilə təltif edilib.
