Sumqayıtda çayxanalar insanların gediş-gəlişinə mane olur.
Sumqayit24.az-a müraciət edən sakinlər bildiriblər ki, Heydər Əliyev prospektinin 19-cu məhəllədən keçən hissəsində, binaların altında fəaliyyət göstərən çayxanalar stol-stullarını səkinin üzərinə düzüb. Buna görə piyadaların hərəkəti çətinləşib.
"Buradan normal keçə bilmirik. Əsasən də xanımlar. Axşam mağazaya, aptekə düşmək lazım olur, sonra həmin yerdən keçəcəyim yadıma düşür və fikrimdən daşınıram", - deyə xanım şikayətçilərdən biri bildirib.
Müraciətdə qeyd olunur ki, problem xüsusilə axşam saatlarında daha çox hiss edilir. Sakinlər səkilərin piyadalar üçün nəzərdə tutulduğunu xatırladaraq, aidiyyəti qurumların məsələ ilə bağlı tədbir görməsini istəyirlər.
