Sumqayıtda yaşayan sakinlər marşrut avtobuslarının xidmətindən narazılıq edirlər.
Bu barədə Sumqayit24.az sözügedən problemlə qarşılaşan vətəndaşlar məlumat veriblər.
Şikayətçilər şəhərin müxtəlif hissələrindən 42 və 43-cü məhəllə, 2 və 3-cü mikrorayon istiqamətində avtobusların qeyri-sabit qrafiklə işləməsindən, yaxud da həmin istiqamətdə ümumiyyətlə marşrut xətlərinin olmamasından çətinlik çəkdiklərini bildirirlər:
“Əvvəllər 30 saylı marşrut gec-gec də olsa, ərazidən keçirdi. Avqust ayından isə sözügedən avtobusların da marşrutu dəyişdirildi. Nəqliyyat vəsitələri 1 saylı Sumqayıt şəhər Xəstəxanasına qədər gəlir, sonra isə dönərək şəhərin əks istiqamətinə hərəkət edir”.
Vətəndaşlar hər gün avtobusları saatlarla gözlədiklərini vurğulayıblar:
“Yeganə ümidimiz “bağ avtobusları”dır. Saat 21:00-ı keçdikdən sonra isə “bağ avtobusları” da yoxa çıxır. Sürücülərdən soruşduqda, qrafik üzrə çalışdıqlarını, axşam saat 21:00-dan sonra işləmədiklərini deyirlər.
İnsanlar işdən-evə, evdən-işə getdikdə əziyyət çəkirlər. Həftəsonları isə ümumiyyətlə avtobus tapmaq olmur.
Köməklik göstərməyinizi xahiş edirik. Vəziyyət o yerə çatıb ki, işdən çıxıb dayanacağa gəlmirik, çünki artıq avtobus olmadığını bilirik və ümidimizi kəsmişik. Şikayət etmədiyimiz qurum da qalmayıb. Əslində biz şikayət yox, tələb edirik. Çünki həqiqətən çox çətinlik çəkirik”.
