Vətən müharibəsi qəhrəmanı, şəhid Mehrab Niftəliyevin doğum günüdür.
Mehrab Söhrab oğlu Niftəliyev 13 may 1985-ci ildə dünyaya gəlib. Baş gizir olan Mehrab 44 günlük müharibə zamanı Füzuli, Cəbrayıl və Şuşanın azadlığı uğrunda gedən döyüşlərdə savaşıb, düşmənin 70-ə yaxın hərbçisini, eyni zamanda bir neçə texnikasını məhv edib.
Gərgin savaşların birində yaralansa da, müalicəsini yarımçıq qoyaraq yenidən ön cəbhəyə qayıdıb. Şuşanın alınması əməliyyatında xüsusi şücaətlə döyüşən Mehrab noyabrın 8-də şəhidlik zirvəsinə ucalıb. O, Sumqayıt Şəhidlər xiyabanında torpağa tapşırılıb.
Azərbaycanın ərazi bütövlüyünün bərpa edilməsində xüsusi xidmətlərinə, igidliyin və mərdliyin nümayiş etdirilməsinə görə şəhidə “Vətən Müharibəsi Qəhrəmanı” adı verilib.
Niftəliyev “Vətən uğrunda”, “Cəbrayılın azad olunmasına görə”, “Füzulinin azad olunmasına görə” və “Şuşanın azad olunmasına görə” medallarına da layiq görülüb.
Mehrab Niftəliyev ailəli idi. Üç övladı Vətənə əmanət qalıb.
