Təcili Tibbi Yardım Stansiyasında təlim təşkil olunub

Təcili Təxirəsalınmaz Tibbi Yardım Stansiyası Şöbəsində (TTTYS) "Fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə olunmasının təşkili" mövzusunda təlim keçirilib. Bu barədə 3 mart tarixində Sumqayıt Tibb Mərkəzinə (STM) istinadən xəbər veririk.

Mülki müdafiə məşqi 4 siqnal üzrə həyata keçirilib:

• İlk siqnalda zəlzələ nəticəsində Təcili Təxirəsalınmaz Tibbi Yardım Stansiyasının qarajında dağıntılar və tələfatın olduğu bildirilib. TTTYS-in həkimi Çiçək Cahangirova həyata keçirilən xilasetmə və təxliyə işlərindən danışıb.


• İkinci siqnalda Etilen-polietilen zavodunda 5 tonluq xlor çəninin dağılaraq ətrafa yayıldığı və nəticədə kimyəvi zəhərlənmələr qeydə alındığı bildirilib. TTTYS-in həkimi Kamal Rzayev vurğulayıb ki, kimyəvi maddələrdən poliklinika şöbəsində zəhərlənənlər olub və onlar ağır vəziyyətdə münasib olan xəstəxanalara yerləşdiriliblər.


• Üçüncü siqnalda bildirilib ki, H.Z. Tağıyev qəsəbəsinin "Kosmonavtlar" yaşayış massivində malyariya infeksion xəstəliyi yayılıb.  TTTYS-in həkimi Nəzakət Əsədova ərazidə olan təhlükənin aradan qaldırılması ilə bağlı həyata keçirilən tədbirlərdən söz açıb.


• Sonuncu siqnalda isə stansiyanın ikinci mərtəbəsində elektrik xətlərində yaranmış qısaqapanmadan yanğın baş verdiyi qeyd olunub. TTTYS-in həkimi Vüsalə Mikayılova bildirib ki, əraziyə yanğınsöndürmə qüvvələri cəlb olunub. Xəsarət alanlar və tüstüdən zəhərlənənlər münasib olan xəstəxanalara yerləşdiriliblər.