Tədris ili başlayar-başlamaz Sumqayıtda nəqliyyat problemi kəskinləşdi.
Yeni dərs ilinin başlanması ilə şəhərdə sərnişindaşıma yükü artıb. Sumqayit24.az-a müraciət edən sakinlər bildiriblər ki, səhər saatlarında işə və dərsə gedən yüzlərlə insan avtovağzalda böyük çətinliklə üzləşib.
Onların sözlərinə görə, Bakıya işləyən 594 və 595 nömrəli avtobusların arasında interval 15–20 dəqiqə olub. Nəticədə nəqliyyat vasitələri dayanacağa çatdığı an dolduğu üçün çoxlu sərnişin avtobusa minə bilməyib. Bu səbəbdən şəhər sakinləri 30–40 dəqiqə gözləməyə məcbur qalıblar.
Şikayətçilər deyirlər ki, bu vəziyyət təkcə vaxt itkisinə yox, həm də insanlarda əsəb və narazılığa səbəb olur. Çünki səhər saatlarında hər dəqiqə önəmlidir – bir çoxları dərsə, digərləri isə işə gecikirlər.
Məsələ ilə bağlı sərnişinlər qeyd ediblər ki, marşrutlarda avtobusların sayının artırılmasına və ya intervalın azaldılmasına ciddi ehtiyac var. Əks halda vəziyyət daha da ağırlaşacaq.
