Sumqayıt şəhərində Xocalı soyqırımının 31-ci ildönümü ilə əlaqədar tədbirlər təşkil olunub. Bu barədə 25 fevral tarixində Sumqayıt24 xəbər verir.
Sumqayıt Dövlət Universitetində keçirilən tədbirdə təhsil ocağının rəhbərliyi və tələbə heyəti iştirak ediblər. Onlar foyedə soyqırımla bağlı foto-sərgiyə baxış keçirib, böyük akt zalında sənədli film izləyiblər.
Heydər Əliyev Mərkəzi və 1 saylı Sumqayıt Regional “ASAN xidmət” Mərkəzinin birgə təşkil etdiyi dəyirmi masada isə Xocalı faciəsinin şahidi Dürdanə Ağayeva, İcra Hakimiyyətinin ictimai-siyasi və humanitar məsələlər şöbəsinin müdir müavini, dini qurumlarla işin təşkilatçısı Fərman Kazımov, “ASAN xidmət” Mərkəzinin direktoru Kəmalə Rəhimova çıxış ediblər.
Nəriman Nərimanov adına Mədəniyyət Mərkəzində də “Xocalı - faciədən doğan intiqam” adlı anım mərasimi baş tutub. Mədəniyyət evinin kollektivi və Heydər Əliyev Mərkəzinin keçirdiyi görüşdə “Xocalı harayı” adlı videoçarx nümayiş olunub. İştirakçılara tədbirdə sərgilənən Xocalı həqiqətləri haqqında Azərbaycan və xarici dillərdə kitablardan, şəkillərdən, qəzet və jurnallardan bəhs edilib.
