Novxanı qəsəbəsində plastik cərrah Türkan Gündüzü xüsusi amansızlıqla qətlə yetirən əri Muhammet Gündüz mərhumun ailəsinə maddi təzminat ödəyəcək.
Qafqazinfo.az-ın məlumatına görə, Sumqayıt Apellyasiya Məhkəməsi zərərçəkmişin hüquqi varisi tərəfindən verilən şikayətə əsasən belə qərar çıxarıb.
Türkan Gündüzün hüquqi varisi onun bacısıdır. O, məhkəmədə nümayəndəsi ilə iştirak edib.
Apellyasiya şikayətində M.Gündüzə verilən 17 illik həbs cəzasının ömürlük cəza ilə əvəz olunması və maddi-mənəvi ziyana görə ümumilikdə 170 min manat təzminat tələb olunub. Mülki iddiada göstərilib ki, ailə dəfn xərcləri, yas mərasimləri, uşaqların yerləşdirilməsi və təhsili, eləcə də istintaq və məhkəmə proseslərində iştirak üçün ümumilikdə 70 min manat maddi ziyan çəkib. Bundan əlavə, 100 min manat məbləğində mənəvi ziyanın ödənilməsi istənilib.
Məhkəmə apellyasiya şikayətini mülki iddia hissəsində qismən təmin edib. Muhammet Gündüzün mərhumun bacısının-hüquqi varisin xeyrinə 15 min 70 manat ödəməsinə qərar verilib.
Həm təqsirləndirilən, həm də zərərçəkmiş tərəfin cəza müddəti ilə bağlı verdiyi apellyasiya şikayətləri təmin olunmayıb. M.Gündüzə əvvəl verilən 17 illik azadlıqdan məhrumetmə cəzası qüvvədə saxlanılıb.
