Tanınmış şair Cəlal Qurbanovun atdan yıxılaraq xəsarət alması ilə bağlı bəzi məqamlara aydınlıq gətirilib. Sumqayıt24 bu haqda 7 iyun tarixində məşhur çapar Gülay Fərzəliyevanın sosial şəbəkə hesabına istinadən xəbər verir.
İnsidentin canlı şahidi olan Gülayın sözlərinə görə, bədbəxt hadisə H.Z. Tağıyev qəsəbəsində baş verib və bir çox xəbər saytı olanları səhv təqdim edib: “Saat 05:15-də günəşin Xəzər dənizi istiqamətindən çıxmasını gözləyirdik ki, istədiyimiz görüntünü əldə edək. Daha sonra, Cəlal müəllim dedi ki, növbəti dəfə at çapaq. Bu an kənardan itlər bizim üstümüzə gəldi. Atlar hürkünərək sürətlərini artırdılar. Nəticədə atın ayağı burada olan çuxura düşdüyündən xoşa gəlməz sonluqla qarşılaşdıq. Təcili Tibbi Yardım çağırdıq. Cəlal müəllimə ilkin yardım edildi və bildirildi ki onun yüngül xəsarətləri var”.
