Sumqayıtda “Şuşa mədəniyyət mərkəzimizdir” adlı tədbir keçirilib. Sumqayıt24 bu barədə 1 noyabr tarixində Regional Mədəniyyət İdarəsinə istinadən xəbər verir.
Zəfər Gününə həsr olunan tədbir Tarixi Muzeydə baş tutub. Toplantıda Vətən müharibəsi şəhidlərinin xatirəsi bir dəqiqəlik sükutla yad edilib, dövlət himni səsləndirilib. Burada Sumqayıt Dövlət Texniki Kollecinin, Sənaye və Yüksək Texnologiyalar üzrə Sumqayıt Dövlət Peşə Mərkəzinin şagird və müəllimlərindən ibarət nümayəndələr və bir qrup gənc mədəniyyət işçisi iştirak ediblər. Çıxış edən Mədəniyyət İdarəsinin rəisi Rəşad Əliyev qəhrəman Azərbaycan ordusunun döyüş meydanında qazandığı tarixi qələbədən söz açıb. Muzeyin kiçik elmi işçisi Zülfiyyə Fətəliyeva tərəfindən “Şuşa mədəniyyət mərkəzimizdir” adlı mühazirə və mövzu əsasında hazırlanan videoçarx təqdim edilib.
Sonda muzey materialları əsasında tərtib olunan “Şuşa mədəniyyət mərkəzimizdir” adlı sərgi tədbir iştirakçılarına təqdim olunub.
