Bu gün Vətən müharibəsi şəhidi, baş leytenant Rövşən Nurzadənin doğum günüdür.
Rövşən Nurzadə 1975-ci il martın 24-də Sumqayıt şəhərində anadan olub. O, tanınmış teatr xadimi, Milli Dram Teatrının sənətçisi, Azərbaycanın xalq artisti Əli Nurun oğludur.
Hərbi Akademiyada təhsil aldıqdan sonra Rövşən Nurzadə Azərbaycan Silahlı Qüvvələrinin təmas xəttində yerləşən hərbi hissələrindən birində leytenant kimi xidmətə başlayıb. 10 illik xidmətindən sonra baş leytenant rütbəsi ilə tərxis olunub.
Vətən müharibəsi başlayanda isə o, könüllü olaraq yenidən cəbhəyə yollanıb. Cəbrayıl, Zəngilan, Qubadlı və Şuşa istiqamətlərində gedən döyüşlərdə iştirak edən Rövşən Nurzadə noyabrın 6-da Şuşa uğrunda gedən döyüşlər zamanı şəhidlik zirvəsinə ucalıb. Şəhid II Fəxri Xiyabanda dəfn olunub.
Göstərdiyi igidlik və şücaətə görə Prezident İlham Əliyevin Sərəncamları ilə Rövşən Nurzadə ölümündən sonra "Vətən uğrunda", "İgidliyə görə", "Qubadlının azad olunmasına görə", "Şuşanın azad olunmasına görə" medalları və "Azərbaycan Bayrağı" ordeni ilə təltif edilib.
