Sumqayıt Tibb Mərkəzində (STM) 8 Noyabr – Zəfər Gününə həsr olunmuş tədbir keçirilib. Sumqayıt24 bu haqda 3 noyabr tarixində xəbər verir.
Tədbirə STM-də çalışan və Vətən müharibəsində iştirak edən tibb heyəti qatılıb. STM-in direktoru Səkinə Sadıxova Vətən müharibəsi başladığı gündən tibb ocağının hərbçilərimizin yanında olduğunu, onlarla həkim və orta tibb personalının yardım üçün könüllü cəbhəyə yollandığını bildirib.
Direktor 500-dən çox şəhid və qazi ailəsinə psixoloji yardım edildiyini diqqətə çatdırıb.
Qeyd olunub ki, Sumqayıt Tibb Mərkəzi 2022-ci ilin fevral ayından bu günə kimi 5390 nəfər qazi, onların və şəhidlərin ailə üzvləri və müharibə iştirakçılarına tibbi xidmət göstərib. Onlardan 1193 nəfəri şəhid ailələrinin üzvləridir.
Bundan əlavə, 170-ə yaxın şəhid ailəsi üzvü, qazi və bu kateqoriyadan olan şəxslər Sumqayıt Tibb Mərkəzində işlə təmin olunub.
Çıxış edən Sumqayıt Səhiyyə işçiləri Həmkarlar İttifaqı Şurasının sədri Elmira Quliyeva rəhbərlik etdiyi qurumun şəhid ailələrini, qaziləri, eləcə də bu kateqoriyadan olan şəxsləri daim diqqətdə saxladıqlarından danışıb. O, həyata keçirilən tədbirlərdən söz açıb.
Vətən müharibəsinin ilk günlərindən cəbhə bölgəsində olan Təcili Tibbi Yardım Xəstəxanasının Travmatologiya şöbəsinin müdiri Aqil Yusubov isə təəssüratlarını bölüşüb.
Sonda STM-də çalışan və müharibədə iştirak edən tibb heyətinə fəxri fərmanlar verilib.
