Ölkəmizdə bu günə qədər bir çox musiqi qrupu fəaliyyət göstərib. Lakin bir zamanlar dəbdə olan musiqi qruplarının çoxu zaman keçdikcə dağılmağa, öz populyarlığını itirməyə başlayıb.
Bu qruplardan biri də “Tin uşaqları”dır.
Sumqayit24.az–ın əməkdaşı “Tin uşaqları”nın rəhbəri, hamının Sədi kimi tanıdığı Sədrəddin Cəfərov ilə həmsöhbət olub.
Müsahibəni təqdim edirik:
- Sədrəddin bəy, öncə müsahibəni qəbul etdiyiniz üçün təşəkkür edirəm. Necəsiniz, işləriniz necə gedir?
- Diqqətiniz üçün təşəkkür edirəm. İşlərim qaydasındadır. Hər şey yaxşı gedir.
- Özünüz haqqında qısa məlumat verməyinizi istərdim.
- Mən Sumqayıt şəhərində anadan olmuşam. Sumqayıtda inşaatçılar qəsəbəsində uşaqlıq illərim keçib. Hazırda Volqoqradda yaşayıram.
- -Qrup üzvlərindən hazırda kimlərlə əlaqəniz var?
- Qrup üzvlərindən İlqar Əkbər ilə daim əlaqəm olub.
- Hazırda fəaliyyətinizi davam etdirirsinizmi?
- Hazırda arada musiqi, bəzən də şeir yazıram. Bakıda yazdığım ən son mahnı Azad Azərbaycan radiosunda yayımlanır. Adı da “Son görüş”dür.
- Yeni qrup yaratmaq fikriniz olub?
- “Tin uşaqları”nda qrup rəhbəri idim. Lakin artıq qrup yoxdur. Yeni qrup yaratmaq fikrim də yoxdur. Solo ifa edirəm.
- Sizcə indi şou-biznesdə vəziyyət nə yerdədir? Sizi qane edirmi?
- Şou-biznes heç vaxt mənə maraqlı olmayıb.
- İfaçılardan kimləri bəyənirsiniz? Dinlədikləriniz varmı?
- İfaçılardan Röya Ayxanı, Brilyant Dadaşovanı dinləyirəm. Bir də rəhmətlik Aygün Bəylərin ifalarını dinləyirdim.
- Gənclərə nə tövsiyə edərdiniz?
- Gənclərə can sağlığı, pis işlərdən uzaq olmağı arzu edirəm. Vətənə və valideynlərə sevgiləri, Allaha da inamları hər zaman olsun. İndiki cavanlar əsas sözlərini 44 günlük müharibədə deyiblər. “Hərbi həkimlər” haqqında söz və musiqisi mənə məxsus mahnı yazmışam.
- Sizcə, yaxşı sənətkar necə olmalıdır?
- Yaxşı sənətçi tarix üçün yaşamalıdır. Bu təkcə musiqiçilərə aid deyil. Digər sahələrdə çalışan insanlar da bunu düşünməlidir.
- Sumqayıt xatirələrinizdən, bu şəhərlə bağlı ifanızdan danışardınız
- Sumqayıt mənim doğma diyarımdır. Bəlkə də yeganə insanam ki, şəhərin adına mahnı yazmışam. Söz və musiqi də mənə məxsusdur. Bu mahnıda da Maestro Ceyhunun və dağlı Faiqin mənə aranjimanda təmənnasız dəstəyi olub. Hər ikisi əslən sumqayıtlıdır.
Nəzrin Vahid
