Ceyranbatan qəsəbəsində ailə tualetdə yaşayır. Bu barədə 11 aprel tarixində Sumqayıt24 xəbər verir.
1 nömrəli məktəbin sanitar qovşağı illərdir ki, ev kimi istifadə edilir. Hətta bu yaşayış yerinin bir neçə dəfə alqı-satqısı da aparılıb. Hazırkı ailədən əvvəl də burada iki ailə yaşayıb.
Sakinlər bildirirlər ki, məktəb rəhbərliyi bu problem və ərazidə hökm sürən natəmizlik, antisanitar vəziyyətlə maraqlanmır.
Qaçqınların və Məcburi Köçkünlərin İşləri üzrə Dövlət Komitəsinin ictimaiyyətlə əlaqələr şöbəsinin rəisi İbrahim Mirzəyev məsələ ilə bağlı ApaTV-yə açıqlama verib. Bildirilib ki, Ağdam rayon sakini Maqsud Ağayev məcburi köçkün düşdükdən sonra valideynləri ilə birgə Bərdə rayonunda müvəqqəti məskunlaşıb:
“O, Ağdam rayonunda istifadəyə verilmiş 165 ailəlik İmamqulubəyli qəsəbəsində 2006-cı ildə valideynləri ilə birgə 3 otaqlı mənzillə təmin olunub. Hazırda həmin mənzildə Maqsud Ağayevin atası Elman Ağayev yaşayır”.
İbrahim Mirzəyevin sözlərinə görə, qurumun mənzil fondunda boş yaşayış sahələri yoxdur. Bir məcburi köçkün ailəsi bir dəfə mənzillə təmin edilir. Onlar üçün mənzillər yalnız işğaldan azad edilmiş ərazilərdə tikilir. Köçürülmə zamanı ilk növbədə ağır şəraitdə yaşayan məcburi köçkünlər nəzərə alınırlar. [modula id="34430"]
