Türkiyədə Azərbaycanın Milli Qəhrəmanının adına parkın açılışı olub. Sumqayıt24 bu barədə 15 noyabr tarixində Azertag.az-a istinadən xəbər verir.
Türkiyənin Kocaeli vilayətinin İzmit rayonunda şəhid general-mayor Polad Həşimov adına parkın açılışı və anım mərasimi keçirilib. Əvvəl Azərbaycan və Türkiyənin Dövlət Himnləri səsləndirilib, şəhidlərin əziz xatirəsi yad edilib. Çıxış edənlər tarixi və milli dəyərlərimizin gələcək nəsillərə çatdırılması baxımından günün əhəmiyyətini vurğulayıblar. Sonra parkın və bu məkanda Polad Həşimovun xatirəsinə ucaldılan büstün açılışı olub.
Ümumilikdə 1680 kvadratmetr ərazidə salınan parkın 70 faizi yaşıllıq, digər 30 faizi isə istirahət və gəzinti sahəsidir. İstirahət guşəsinin yaşıllıq bölümündə 2.420 ədəd tibbi və aromatik bitki əkilib.
Polad Həşimovun parkda qoyulan büstü heykəltaraş Nusrettin Bektaş tərəfindən hazırlanıb.
