Sumqayıtda bayram tədbiri keçirilib. Bu haqda 26 dekabr tarixində Regional Mədəniyyət İdarəsinə istinadən xəbər veririk.
Səid Rüstəmov adına 3 nömrəli Uşaq İncəsənət Məktəbində keçirilən tədbir Yeni ilə və Dünya Azərbaycanlılarının Həmrəyliyi Gününə həsr olunub. Burada Regional idarənin rəisi Rəşad Əliyev, müavini İlham Əhmədov, Musiqi Kollecinin direktoru Səbinə Mextiyeva, məktəb direktorları, qazilər və əsgərlər iştirak ediblər. Onlara ilk olaraq Həmrəylik Günü barədə geniş məlumat verilib. Sonra məktəbin şagird və müəllim kollektivi konsert proqramı ilə çıxış ediblər. “Şahinlər “ rəqs qrupunun ifasında “Azərbaycan süitası” (rəhbəri Vüqar Cəfərov), məktəbin müəllimlərindən ibarət xor kollektivinin ifasında Niyazi və Cövdət Hacıyevin “Bəxtiyarlıq mahnısı” (dirijor Şərqiyyə Mustafayeva, konsertmeyster İradə Ağalarova), fortepianoda 4-cü sinif şagirdi Nigar Mustafayevanın ifasında T. Quliyevin “Prelude 2” (müəllim Rəna Salayeva), vokal şöbəsinin şagirdləri Əli Şərifzadə və Emin Sabitoğlunun ifasında Vəfa Bağırzadənin “Sən əbədi bir ocaqsan” (müəllim Nuranə Əhmədova, müşayiət edir: skripkaçılar ansamblı, rəhbər Lyudmila Əliyeva və Violetta Həsənəlizadə, konsertmeyster Təranə İsmayılova), qarmonda Mirzə İsayevin ifasında Elza İbrahimovanın “Gecələr bulaq başı” (müəllim Fəridə Bağıyeva, konsertmeyster Ofelya Rufullayeva), sazda Fərid Baxşəli və Yusif Əmiraslanovun ifasında “Bəhri Divani“ havası (müəllim Habil Alıyev) səslənib.
Tədbirin sonunda Rövşanə Əliyeva, Fərid Abdullazadə və Kamran Babayev “Qarabağ şikəstəsi” ritmik muğamını səsləndiriblər.
