Sumqayıtda qəsdən sağlamlığa az ağır zərər vurmaqda təqsirləndirilən Sabir Qasımovun (şərti) barəsində çıxarılmış hökmdən verilmiş apellyasiya şikayəti üzrə məhkəmə iclası başa çatıb.
Pravda.az-ın məlumatına görə, Sumqayıt Apellyasiya Məhkəməsində hakim Elman Əhmədovun sədrliyi ilə keçirilən prosesdə qərar elan olunub.
Zərərçəkmiş şəxs tərəfindən verilmiş apellyasiya şikayətinin baxılmasına xitam verilib, Abşeron Rayon Məhkəməsinin çıxardığı hökm ləğv olunub və iş yenidən baxılması üçün məhkəməyə qaytarılıb.
İttihama görə, hadisə 2024-cü il martın 9-da Xırdalan şəhəri, M. Hüseynzadə küçəsində yerləşən “Rahat Market”in qarşısında baş verib. Belə ki, Sabir Qasımov yeznəsi, zərərçəkmiş Tahir Tahirovla (şərti) mübahisə edib. Mübahisəyə səbəb isə zərərçəkmişin onun bacısından ayrıldıqdan sonra övladları ilə maraqlanmaması olub. Bu zaman Sabir çəkiclə, yumruqla və ayaqla Tahirin bədəninin müxtəlif nahiyələrinə zərbələr endirərək ona xəsarət yetirib. Hadisədən sonra Sabir Qasımov saxlanılıb və barəsində başqa yerə getməmək haqqında iltizam qətimkan tədbiri seçilib.
Abşeron Rayon Məhkəməsinin hökmü ilə ona 1 il müddətinə azadlığın məhdudlaşdırılması (elektron qolbaq tətbiqi ilə) cəzası təyin edilib.
