Sumqayıtda Vətən müharibəsi iştirakçısı İlkin Ağazadə görüş keçirib. Sumqayıt24 bu haqda bu gün, 2 aprel tarixində DünyaTV-yə istinadən xəbər verir.
Görüş 41 nömrəli məktəbdə baş tutub. Ağazadə şagirdlərə 44 günlük müharibədə keçdiyi döyüş yolu haqda danışıb, onların suallarını cavablandırıb. Tədbir şagirdlərin kompozisiyaları ilə davam edib. Sonda isə qaziyə, iştirakına görə “Təşəkkürnamə” təqdim olunub.
Qeyd edək ki, İlkin Ağazadə 2014-cü ildən orduda xidmət edib və “Komando” taborunun qərargah rəisi vəzifəsinədək yüksəlib. Müxtəlif ölkələrdə keçirilən təlimlərdə olub. Müharibədən sonra isə “Vətən uğrunda”, “İgidliyə görə”, “Füzulinin azad olunmasına görə”, “Xocavəndin azad olunmasına görə”, “Cəbrayılın azad olunmasına görə” və “Qubadlının azad olunmasına görə” medalları ilə təltif edilib.
