Sumqayıtda klipin təqdimat mərasimi baş tutub. Sumqayıt24 bu barədə 17 noyabr tarixində Regional Mədəniyyət İdarəsinə istinadən xəbər verir.
“Qəhramanlıq elegiyası” adlı klip bəstəkar Lalə Şirinin Vətən müharibəsi zamanı şanlı Zəfərimizlə tarix yazan qəhrəmanlara həsr olunub. Heydər Əliyev Mərkəzində baş tutan tədbirdə dövlət himni səsləndirilib, şəhidlərimizin əziz xatirəsi bir dəqiqəlik sükutla yad edilib. Burada şəhid anaları, elm və mədəniyyət işçiləri, qələm adamları, klipin yaradıcı heyəti iştirak ediblər. Onlar Zəfərimizin tarixindən, nümayiş olunan klipdən bəhs ediblər.
Gecənin aparıcısı Əminəxatun Tərlan qonaqlara bəstəkarın yaradıcılığı haqqında geniş məlumat verib. Sonra klip nümayiş olunub, tədbir iştirakçıları ekran əsərini göz yaşları və alqışlarla qarşılayıblar.
Gecənin musiqili qonaqları olan şəhid və qazi övladlarından ibarət “Əmanət” xor kollektivi, Nizami Quliyev və Polad Quliyevin vətənpərvər ruhlu ifaları isə tədbirə xüsusi gözəllik qatıb. Tədbirin sonunda xatirə şəkilləri çəkdirilib.
