Sumqayıt şəhərində şəhid Vüsal Allahverdiyevin xatirəsinə quraşdırılan barelyefin açılışı olub. Bu haqda bu gün, 31 may tarixində Sumqayıt24 xəbər verir.
Barelyef şəhidimizin yaşadığı binanın yanında ( 9-cu mkr, bina 42) qoyulub. Mərasimdə Vüsalın yaxınları, dostları, Qubadlı rayon İcra Hakimiyyətinin başçısı Malik İsaqov və qurumun əməkdaşları, eləcə də ictimaiyyət nümayəndələri iştirak ediblər.
Vüsal Füzulinin, Cəbrayılın və Xocavəndin işğaldan azad edilməsi uğrunda və Füzuli rayonunun Seyidəhmədli kəndi istiqamətində gedən döyüşlərdə iştirak etmişdir. 30 oktyabr 2020-ci ildə Xocavənd istiqamətində döyüş tapşırığını yerinə yetirən zaman şəhid olmuşdur. O, Sumqayıt Şəhidlər Xiyabanında dəfn olunub.
Vüsal Allahverdiyev ölümündən sonra “Vətən uğrunda” , “Döyüşdə fərqlənməyə görə”, “Füzulinin azad olunmasına görə” medalları ilə təltif edilib.
Vətən müharibəsində Qubadlı rayonundan 11 şəhid və 40-dan çox qazi öz adlarını tarixə yazdırıblar. [modula id="15920"]
