Sumqayıtda şəhidlər Sabir Əbdürrəhmanlı və Samir Nadirovun ailələri ziyarət edilib. Bu haqda bu gün, 26 may tarixində Sumqayıt24 xəbər verir.
Məlumata əsasən, İcra Hakimiyyəti yanında Əlaqələndirmə Mərkəzinin rəhbəri Gündüz Əliyev və üzvləri şəhid Əbdürrəhmanlının anasını ziyarət ediblər. Qonaqlar şəhid anasının qayğıları ilə maraqlanıb.
Sumqayıt Dövlət Rəsm Qalereyasının əməkdaşları isə şəhid, kiçik çavuş Samir Nadirovun ailəsini ziyarət ediblər. Görüş zamanı şəhidin anası qonaqlara oğlu haqqında xatirələrini bölüşüb.
Daxili Qoşunların çavuşu olan Sabir Əbdürrəhmanlı Vətən müharibəsi zamanı Cəbrayılın və Füzulinin azadlığı uğrunda gedən döyüşlərdə savaşıb. O, oktyabrın 8-də Füzuli döyüşləri zamanı şəhid olub.
Sabir Əbdürrəhmanlı ölümündən sonra "Vətən uğrunda” medalı ilə təltif edilib. Eyni zamanda Kəlbəcərin, Cəbrayılın və Füzulinin azad olunması görə medalları ilə də təltif olunub.
Samir Nadirov Vətən müharibəsi zamanı Cəbrayıl rayonunda və Füzulinin azadlığı uğrunda gedən döyüşlərdə iştirak edib. O, oktyabrın 15-də Füzuli istiqamətində gedən döyüşlərdə şəhidlik zirvəsinə ucalıb. Qəhrəmanımızın Emil və Məryəm adlı 2 övladı vətənə yadigar qalıb.
Samir Nadirov ölümündən sonra "Vətən uğrunda”, "Füzulinin azad olunmasına görə” medalları ilə təltif edilib.
