Vətən müharibəsi şəhidi Orxan Rəhimlinin anım günüdür.
Əslən Qubadlı rayonunun Qiyaslı kəndindən olan Orxan Elxan oğlu Rəhimli 20 iyun 1992-ci ildə Sumqayıt şəhərində anadan olub.
Orta təhsilini 1992-2008-ci illərdə H.Z.Tağıyev qəsəbəsində yerləşən F. Cəfərov adına məktəbdə alıb. Hərbi xidməti başa vurduqdan sonra Quba Texniki Kollecində Yol hərəkətinin təşkili ixtisası üzrə təhsil alıb. 2014-cü ildən N saylı hərbi hissədə müddətdən artıq həqiqi hərbi xidmət (MAXE) hərbi qulluqçusu kimi çalışıb. Aprel döyüşlərinin iştirakçısı olub.
Vətən müharibəsi zamanı Füzuli, Cəbrayıl, Hadrut, Zəngilan, Qubadlı, Kəlbəcər və Laçının azadlığı uğrunda savaşıb. 28 iyun 2021-ci ildə Laçın rayonu ərazisində “KamAZ” markalı hərbi yük avtomobilinin qəzaya uğraması nəticəsində şəhədətə ucalıb. Sumqayıt şəhər Şəhidlər xiyabanında dəfn olunub.
Ailəli idi, Hüseyn və Pəri adında 2 övladı Vətənə əmanət qalıb.
Orxan Rəhimli ölümündən sonra “Laçının azad olunmasına görə” və “Füzulinin azad olunmasına görə” medalları ilə təltif olunub.
