Sumqayıt şəhəri Xəzri yaşayış massivinin sakinləri kanalizasiya xəttinin olmamasına görə narazılıqlarını bildiriblər. Bu haqda bu gün, 25 fevral tarixində RealTV xəbər verib.
Məlumata əsasən, sakinlər burada 35 ildən çoxdur ki yaşayırlar. Onların sözlərinə görə, daimi olaraq aşıb-daşan çirkab sular evlərin zirzəmilərinə dolaraq antisanitar vəziyyət yaradır.
Massivin digər problemi isə, yollarda asfalt örtüyünün olmamasıdır. Sakinlər bildirib ki, 2 dəfə yola öz hesablarına çınqıl daş töküblər. Lakin su xətti təmir edilən zaman yol dağıdılıb, və ondan sonra yenilənməyib.
Bu məsələ ilə bağlı Sumqayıt Bələdiyyəsinin şöbə müdiri Samir Babayev sakinləri qəbul edib, onların şikayətlərinə qulaq asıb. O bildirib ki, vətəndaşlar bu günədək aidiyyəti qurumlara müraciət etməyiblər. Onlar yazılı sürətdə müraciət etdikləri halda adıçəkilən qurum sakinlərə köməklik göstərə bilər.
