Sumqayıt Dövlət Universitetində Xalq şairi Vahid Əziz ilə görüş keçirilib. Sumqayıt24 bu haqda universitetin saytına istinadən xəbər verir.
Böyük akt zalında baş tutan “Sözün sevgi kölgəsi” adlı görüş Filologiya fakültəsi tərəfindən təşkil olunub. Qonaqlar burada olan Heydər Əliyev Mərkəzində ulu öndərin zəngin həyatını əks etdirən fotoşəkillərlə və ona həsr olunmuş kitablarla tanış olublar. Şair Vahid Əziz Mərkəzin xatirə kitabında ürək sözlərini qeyd edib.
Tədbir Muğam müsabiqəsinin laureatı, müğənni Gülzar Fərəcovanın ifasında Əzizin sözlərinə bəstələnmiş “Bayatılar” musiqisinin sədaları ilə başlayıb. Daha sonra tələbələr “Mənə yüz il ömür arzulamayın” kompozisiyasını ifa edib. İştirakçılara Vahid Əzizin həyat və yaradıcılığından bəhs edən videoçarx nümayiş olunub.
Görüş zamanı şairin respublika Dövlət mükafatına təqdim edilmiş "Param-parça illər" kitabı haqqında geniş məlumat verilib. Sonra Vahid Əziz tələbələrin suallarını cavablandırıb, yaradıcılığı ilə bağlı bir sıra məqamlara aydınlıq gətirib, öz şeirlərini oxuyub.
Sonda isə qonağa universitet adından hədiyyələr təqdim olunub, xatirə şəkilləri çəkdirilib.
