Sumqayıt Kimya Sənaye Parkında görüş keçirilib. Sumqayıt24 bu haqda 17 yanvar tarixində İqtisadi Zonaların İnkişafı Agentliyinə (İZİA) istinadən xəbər verir.
Belarus Respublikasının Azərbaycandakı fövqəladə və səlahiyyətli səfiri Andrey Ravkovun rəhbərlik etdiyi nümayəndə heyətinə sənaye zonaları, sahibkarlar üçün yaradılan əlverişli investisiya mühiti, tətbiq edilən vergi və gömrük güzəştlərindən danışılıb, sənaye zonalarının təqdimatı göstərilib.
Həmçinin hər iki ölkənin sənaye zonaları və aqroparkları arasında əməkdaşlığın qurulması, birgə təcrübə mübadiləsinin aparılması imkanları müzakirə olunub. Belaruslu iş adamları sənaye zonalarındakı əlverişli biznes və investisiya mühitindən yararlanmağa dəvət ediliblər.
Sonda nümayəndə heyəti Sumqayıt Kimya Sənaye Parkında görülmüş işlərlə, rezident “Azərbaycan Vanhong Ceramics Co.” MMC-nin keramik plitələrin istehsalı müəssisəsinin fəaliyyəti ilə tanış olub.
