Xəzər dənizində invaziv (yad mənşəli) canlıların sayı artır. Alimlər bunun iqlim dəyişikliyi və su yollarının genişlənməsi ilə əlaqəli olduğunu deyirlər.
Sumqayit24.az xarici KİV-ə istinadən xəbər verir ki, 2024-cü ildə Orta Xəzərdə ilk dəfə Ceratium tripos var. balticum adlı mikroskopik yosun aşkarlanıb. O zaman sudakı miqdarı az – hər nümunədə cəmi 3-10 hüceyrə idi. Amma bu ilin yazında bu yosunun sayı 200-ə qədər artıb. Bu isə onu göstərir ki, yeni canlı dənizdə sürətlə çoxalır.
Mütəxəssislər bildirirlər ki, bu, Xəzərdə ilk belə hal deyil. 1934-cü ildə Pseudosolenia calcar-avis adlı başqa bir iri yosun növü də burada yayılmışdı. Onun ölçüsü böyük olduğuna görə, zooplankton (suda yaşayan xırda canlılar) onu yeyə bilmirdi. Nəticədə yerli yosunlara təzyiq artmış və bəzi canlıların sayı azalmışdı.
Yeni aşkarlanan Ceratium tripos var. balticum isə əvvəlkindən də böyükdür. Alimlərin sözlərinə görə, bu növ zooplankton üçün əsas qida olan xırda yosunların sayını azalda bilər. Bu da öz növbəsində balıqlar və digər su canlıları üçün təhlükə yarada bilər.
Tədqiqatçılar xəbərdarlıq edirlər ki, bu yosun növü gələcəkdə Xəzərdə daha da çoxala bilər. Bu isə dənizdəki canlıların tarazlığına mənfi təsir göstərə bilər.
