Xırdalan-Sumqayıt xətti üzrə qatarların hərəkəti hələ də bərpa olunmayıb... Halbuki bir müddət əvvəl həmin ərazidə işlərin yekunlaşdığı və sərnişin qatarının yeni tədris ili ərəfəsində fəaliyyətini bərpa edəcəyi bildirilmişdi.
Sakinlərin sözlərinə görə, Xırdalan-Sumqayıt dəmir yolu marşrutu üzrə qatarların hərəkətinin bərpası gündəlik həyatı xeyli asanlaşdırar.
Onlar bildirirlər ki, bu marşrutun yenidən istifadəyə verilməsi həm Sumqayıtdan Bakıya, həm də Xırdalandan Sumqayıta səfər edən sərnişinlərin yol problemini yüngülləşdirər, vaxta qənaət etmələrinə imkan yaradar.
Sumqayit24.az məsələ ilə bağlı "Azərbaycan Dəmir Yolları" QSC-yə sorğu ünvanlayıb. Qurumun mətbuat katibi Bəxtiyar Hacıyev sorğuya açıqlamasında bildirilib ki, dəmir yollarında sərnişin və yüklərin təhlükəsiz daşınması üçün dəmir yolu xətlərinin vəziyyəti xüsusi diaqnostika qatarı vasitəsilə mütəmadi olaraq yoxlanılır:
"Yoxlama zamanı aşkar edilən qüsur və çatışmazlıqlar qiymətləndirilir və aradan qaldırılması üçün operativ və planlı tədbirlər görülür.
Xırdalan–Biləcəri sahəsində körpünün təmirinə də məhz bu qaydada qərar verilib. Əvvəlki yoxlamalar zamanı körpüdə təcili təmir tələb edən hər hansı qüsur müəyyən edilməmişdi. Növbəti diaqnostika zamanı isə körpüdə hərəkətin təhlükəsizliyini riskə ata və qatarların interval üzrə hərəkətinə mane ola biləcək qüsurlar aşkarlanıb və dərhal aradan qaldırılması üçün operativ müdaxilə qərarı qəbul edilib.
Hazırda təmir işləri davam etdirilir. Körpünün bərpası başa çatdıqdan və müəyyən hazırlıq işlərindən sonra Xırdalan–Sumqayıt xətti üzrə sərnişindaşıma bərpa ediləcək".
