Sumqayıtda “Xocalı ağrısından gələcəyə doğru” adlı tədbir keçirilib. Bu haqda bu gün, 23 fevral tarixində Regional Mədəniyyət İdarəsinin Facebook səhifəsinə istinadən xəbər veririk.
Görüş Heydər Əliyev Mərkəzində, Nəriman Nərimanov adına Mədəniyyət Mərkəzinin, “Dostluq” mədəniyyət evinin və adıçəkilən mərkəzin birgə təşkilatçılığı ilə baş tutub.
İştirakçılar “Dostluq” mədəniyyət evinin rəsm dərnəyi üzvlərinin mövzuya aid əl işlərini gözdən keçirib və H. Əliyev Mərkəzinin Xocalıya həsr etdiyi kitab sərgisi ilə tanış olublar.
Burada, yazıçı-kulturoloq, ssenarist Hafiz Ataxanlı törədilmiş Xocalı qətliamı haqqında geniş məlumat verib.
Çıxış edən Xocalı sakini Mürvət Məmmədov bildirib ki, ermənilərin Xocalı şəhərini hədəfə almaqda məqsədi bir tərəfdən Qarabağın dağlıq hissəsində azərbaycanlılardan ibarət olan maneəni aradan qaldırmaq idisə, digər tərəfdən ümumiyyətlə Xocalını yer üzündən birdəfəlik silmək idi.
Sonda Xocalı sakinləri o dəhşətli günlə bağlı gördükləri, yaşadıqları haqda danışıblar.
