İnstagram sosial şəbəkəsində icra olunan “Sevinj stories” adlı layihənin baş qəhrəmanı Nəzakət Heydərovadır. Nəzakət 27 iyun 2012-ci ildə Sumqayıt şəhərində dünyaya gəlib. Bundan əvvəl o, “Zəhər tuluğu” filmində Şəms rolunu canlandırmışdı. Sumqayıt24 onun haqda Report-a istinadən yazır.
Sözügedən layihənin məqsədi Xocalı soyqırımı ilə bağlı paylaşımlar etmək, ermənilərin dinc əhaliyə qarşı törətdikləri vəhşilikləri Dünyaya çatdırmaq və Xocalı qurbanlarının xatirəsini yad etməkdir.
9 yaşlı istedad Nəzakət Heydərovanın sözlərini təqdim edirik:
“Xocalını görməsəm də, çəkilişlər zamanı sanki o anları yaşayıram, hətta bir dəfə çəkiliş zamanı məni, həqiqətən ağlamaq tutdu... Mənim üçün belə tarixi mövzunun qəhrəmanı olmaq qürurvericidir”.
Qeyd edək ki, layihəni 8 nəfər icra edir. Sevincin babası rolunu Əməkdar artist Mirzə Ağabəyli ifa edir. Çəkilişlər fevralın sonunadək davam edəcək.
