Sumqayıtda 100-ə yaxın adamın yaşadığı binanın zirzəmisini obyektə çevirmək istəyiblər. Sumqayıt24 bu haqda 3 avqust tarixində Xəzər Xəbər-ə istinadən xəbər verir.
Hadisə 13-cü mikrorayonda, 4a saylı binada qeydə alınıb. Səs eşidən sakinlər, əvvəlcə hansısa bir mənzildə təmir işlərinin getdiyini zənn ediblər. Lakin sonradan görüblər ki binanın zirsəmisi qazılır, divarları isə deşilir. Tikilinin qəzalı vəziyyətə düşəcəyindən narahat olan vətəndaşlar qazıntı işlərini qarşısını alıblar.
Məlum olub ki, Vüsal Məmmədov adlı vətəndaş burada özü üçün obyekt düzəltməyə qərar verib. O, 240 kv.m sahəsi olan zirzəmidə qazıntı və söküntü işlərini əsasən gecə saatlarında görüb.
Sumqayıt şəhər İcra Hakimiyyətindən məsələ ilə bağlı bildirilib ki, yaşayış binasının zirzəmisində hər hansı bir obyektin tikintisindən söhbət belə gedə bilməz. Vətəndaşların narazılığına səbəb olan məsələlər aradan qaldırılacaq.
