Sumqayıt şəhərinin 13-cü mikrorayonunda yerləşən zibil konteynerlərinin vəziyyəti yenidən narazılığa səbəb olub.
Sumqayit24.az-a müraciət edən sakin bildirib ki, ötən ilin noyabr ayında dərc etdiyimiz xəbərin ardından ərazidəki köhnə konteyner dəyişdirilib, əlavə olaraq bir neçə yeni zibil konteyneri quraşdırılmışdı. Lakin cəmi bir neçə ay keçməsinə baxmayaraq, hazırda onların əksəriyyəti yenidən yararsız vəziyyətə düşüb.
Onun sözlərinə görə, konteynerlərin bəziləri sınıb, bəziləri isə deformasiyaya uğrayıb. Nəticədə zibil qablarının ətrafına tullantılar səpələnir, uzun müddət təmizlənmədiyi üçün isə ərazidə xoşagəlməz qoxu yaranır.
Qeyd olunur ki, problemli ərazi 33 və 34 nömrəli tam orta məktəblərin, eləcə də uşaq bağçasının yaxınlığında yerləşir. Bu isə həm məktəblilərin, həm də ətrafda yaşayan sakinlərin narahatlığını artırır.
Sakinlər aidiyyəti qurumlardan konteynerlərin yenilənməsini, zədələnmiş zibil qablarının dəyişdirilməsini və ərazidə tullantıların vaxtında təmizlənməsini xahiş edirlər. Onların fikrincə, quraşdırılan yeni konteynerlərin qısa müddətdə yararsız vəziyyətə düşməsi həm istismar keyfiyyəti, həm də müntəzəm nəzarət məsələsini gündəmə gətirir.
