Sumqayıtda builki qəbul imtahanlarında 650-dən yuxarı bal toplayan məzunlarla görüş keçirilib.
Sumqayit24.az xəbər verir ki, Sumqayıt Dövlət Dram Teatrında təşkil edilən görüşdə Abşeron-Xızı Regional Təhsil İdarəsinin müdiri İlhamə Abdullayeva, Sumqayıt Şəhər İcra Hakimiyyətinin başçısı Zakir Fərəcov, müəllimlər və yüksək balla qəbul olan məzunlar iştirak ediblər.
Bildirilib ki, ötən tədris ilində Sumqayıt şəhəri üzrə 4 min 467 nəfər ümumtəhsil məktəbinin 11-ci sinfini bitirərək məzun olub. Onlardan 3 min 916 nəfəri ali məktəblərə sənəd verib və 2 min 786 nəfəri imtahandan uğurla keçərək, ölkənin müxtəlif universitetlərinə qəbul edilib.
Şəhər üzrə 69 məzun 650-dən, 23 məzun 670-dən, 11 məzun isə 680-dən yuxarı bal toplayıb. Ümumilikdə 194 məzun 600-dən yuxarı nəticə göstərib.
Görüşün sonunda 650 baldan yüksək nəticə göstərən tələbələrə hədiyyələr təqdim edilib.
