Sumqayıtda “Dünyanı elmlə öyrənək” adlı dəyirmi masa keçirilib. Sumqayıt24 bu barədə 2 noyabr tarixində Gənclər evinə istinadən xəbər verir.
“Elm və texnologiya ili” çərçivəsində keçirilən tədbir S.Vurğun adına Mərkəzi Kitabxana Sistemi, Tarixi Muzey və Gənclər evinin birgə təşkilatçılığı ilə baş tutub.
Burada şəhərimizin ziyalıları, Gənclər evi, kitabxana oxucuları iştirak ediblər. Sumqayıtın Tarixi Muzeyində keçirilən tədbirin əvvəlində iştirakçılar muzeyin foyesində təşkil edilən elm xadimlərimizin həyat və fəaliyyətini əks etdirən kitablardan ibarət sərgi ilə tanış olublar. Şəhidlərin xatirəsi bir dəqiqəlik sükutla yad edildikdən sonra azərbaycanlı alimlərə həsr edilən videoçarx izlənilib.
Mərkəzi Kitabxananın əməkdaşı Xəyalə Seyidnurova çıxışında bildirib ki, məqsəd elm xadimlərimizi gənclərə tanıtmaq, onların işıqlı həyat yolunu nümunə göstərməkdir. Sonda dəyirmi masa ətrafında müzakirələr aparılıb.
