İnsanlar H.Z. Tağıyev qəsəbəsinə əvvəlki kimi giriş-çıxış edə bilmirlər. Sumqayıt24 bu haqda 20 aprel tarixində xəbər verir.
Ötən il Bakı - Quba yolunda aparılan təmir işləri zamanı əraziyə arakəsmələr qoyulub. Nəticədə qəsəbədən çıxan sürücülər Bakı istiqamətinə getmək üçün 2.5 km uzaqlıqda qoyulan geriyə dönüş nöqtəsinə getməlidirlər.
Sakinlərin dediyinə görə, həmin nöqtədə olan dairə də təhlükə mənbəyidir. Dairəyə təqribən 50 metr qalmış yol nişanı olsa da, bu, gecənin zülmətində ərazidəki qəza təhlükəsini azaltmır. Xüsusilə, qəsəbədən çıxıb bu dairəyə daxil olan sürücülər burada bir neçə dəfə qəzaya düşüblər:
“Əslində ərazidəki təhlükəni görmək üçün gecəni gözləməyə ehtiyac yoxdur. Günün günorta çağı eyni anda dairəyə düzünə sağa, düzünə sola, yaxud da geriyə dönmək üçün daxil olanlar qəzadan son anda yayına bilirlər”.
Azərbaycan Avtomobil Yolları Dövlət Agentliyindən (AAYDA) məsələ ilə bağlı ARB Xəbər-ə açıqlama verilib. Bildirilib ki, dairə yol hərəkətinin tələblərinə tam cavab verir. Yəni sürücülər nişan tələblərinə uyğun hərəkət etsələr, təhlükə yaranmaz. O ki qaldı məsafəyə:
“Bu ərazidə müvafiq dövlət qurumları ilə birgə əraziyə baxış keçirilib. Ən optimal yer olaraq hal-hazırda o dairənin yerləşdiyi ərazi seçilib. Bura geniş yol olduğu üçün geri dönmə hissəsinin yaradılması məqsədilə əlavə sürətlənmə zolaqlarının tətbiqi genişləndirmə çərçivəsində mümkün olmadığına görə sözügedən ərazi ən optimal və təhlükəsiz ərazidir”.
Qeyd olunub ki, sakinlər çətinliklə üzləşiblərsə, agentliyə müraciət edə bilərlər. Vəziyyət yenidən dəyərləndirilə, qəsəbəyə yaxın yerdə daha bir geriyə dönmə təşkil oluna bilər. Bu isə yalnız Baş Dövlət Yol Polisi İdarəsi ilə razılaşdırma əsasında mümkündür.
