Küçələrin axşam saatlarında işıqlandırılması həm piyada, həm də sürücülərin təhlükəsizliyi üçün çox vacibdir. Xüsusən də əgər söhbət əsas küçədən gedirsə, məsələnin nə dərəcədə əhəmiyyətli olduğu anlaşılır. Amma Saray qəsəbəsinin əsas küçəsi bir neçə ildir ki, işıq üzünə həsrət qalıb. Söhbət qəsəbənin Heydər Əliyev küçəsindən gedir. Hər gün minlərlə avtomobil bu yoldan hərəkət edir. Sumqayıt sakinlərinin əksəriyyətinin Bakıya yolu da məhz buradan keçir. Amma küçənin işıqlandırılmaması həm yerli sakinlərin, həm piyadaların, həm də sürücülərin narahatlığına səbəb olub.
Sumqayit24.az problemlə bağlı Abşeron Rayon İcra Hakimiyyəti ilə əlaqə saxlayıb. Qurumdan bildirilib ki, Heydər Əliyev küçəsinin işıqlandırılması istiqamətində işlər aparılır:
“Yeraltı xətlərdə və sayğaclarda müəyyən nasazlıqlar var. Onların həlli üzərində işləyirik. Ərazi ən yaxın zamanda işıqlandırılacaq”.
Nəzrin Vahid
