Sumqayıt şəhəri, Xəzər bağlarında elektrik təchizatı zəifdir. Sumqayıt24-ə bu barədə 15 iyun tarixində yerli sakinlər bildiriblər.
Elektrik enerjisinin verilişi qeyri-stabil olduğu üçün onlar avadanlıqları qoşmaqdan çəkinirlər. Bu problem ilboyu, əsasən də yay aylarında çətinliklər yaradır.
Sakinlər 2 il öncə məsələ ilə bağlı “Azərişıq” ASC-yə müraciət ünvanlayıblar. Qurumun əməkdaşları əraziyə baxış keçirib, problemin Bakıdan tapşırıq gəldiyi təqdirdə həll olunacağını bildiriblər. Lakin bu günədək bu istiqamətdə heç bir tədbir görülməyib.
“Ötən il yenidən yazdıq, yenə gəldilər. Dedik ki, bizə transformator verilməlidir, bu ərazidə yaşayış çoxdur. Hər ay yazdıq, zəng etdik, həll ediləcəyini dedilər. Yay başlayıb, heç nədən istifadə edə bilmirik. Soyuducu normal soyutmur, kondisioner isə bəzək kimi asılıb divarda. Paltaryuyandan ancaq gecələr istifadə edə bilirik. İşıq gah güclənir, gah da zəifləyir. Taxtadan evlərdə yaşayanlar qısaqapanmadan, yanğından qorxurlar. Hər kəs narazıdır”, - deyə şikayətçilər əlavə ediblər.
