Sumqayıtda yeni sayğaclar quraşdırılacaq. Sumqayıt24 bu haqda 29 aprel tarixində “Azərsu” ASC-yə istinadən xəbər verir.
İstehlakçıların içməli su ilə təmin edilməsi, sudan nəzarətdənkənar istifadə hallarının aşkarlanması və aradan qaldırılması məqsədilə Tədbirlər Planı təsdiqlənib.
İlk növbədə sənaye müəssisələri, ictimai-iaşə obyektləri, yaşıllıqlar, parklar, avtoyuyucu məntəqələr və digər obyektlər tərəfindən su təchizatı sistemlərinə qanunsuz qoşulmaların müəyyən edilməsi və sayğacla təmin olunması istiqamətində tədbirlər görüləcək. Eyni zamanda cari ilin sonuna kimi sayğacsız abonentlər sayğaclarla təmin ediləcəklər.
İşlərin icrası üçün qruplar yaradılıb. İşçi qruplar nöqsanların aradan qaldırılmasına nəzarət edəcək, aşkarlanmış faktlarla bağlı təhlillər aparacaq, icra hakimiyyəti ilə əlaqəli fəaliyyətin təşkilini həyata keçirəcək.
Bundan sonra içməli su təchizatı sistemlərinə özbaşına qoşulma, sudan qanunsuz və nəzarətdənkənar istifadə halları aşkarlandıqda sərt tədbirlər görüləcək, suyun xeyli miqdarda talanması halları üzrə birbaşa hüquq-mühafizə orqanlarına müraciət olunacaq. Bu hallara şərait yaradan məsul şəxslər barəsində ciddi tədbirlər görüləcək.
