Ali Məhkəmədə qəsdən sağlamlığa ağır zərər vurmada təqsirləndirilən Pərviz Ağayevin barəsindəki qərardan verilən kassasiya şikayəti üzrə məhkəmə iclası başa çatıb.
Pravda.az-ın məlumatına görə, hakim İlqar Qılıcovunın sədrliyi ilə keçirilən prosesdə qərar elan olunub.
Qərara əsasən, kassasiya şikayəti təmin edilməyib.
İttihama görə, hadisə 22 iyun 2023-cü il tarixdə Sumqayıt şəhəri, Corat qəsəbəsi ərazisində qeydə alınıb. Belə ki, Pərviz Ağayev tanışı, zərərçəkmiş Novruzbəy Məmmədova istifadə etmək məqsədilə narkotik maddə verib. Lakin zərərçəkmiş ona verilənin narkotik maddə olmadığını və aldadıldığını bildirib. Bu səbəbdən onların arasında mübahisə yaranıb. Hər iki şəxs sakit yerdə söhbət etmək üçün birlikdə Sumqayıt şəhəri, Novxanı bağları ərazisində "Sarı qaya" deyilən yerdə yeni tikilmiş fərdi evlərin yerləşdiyi küçəyə gəlib. Yenidən söhbət zamanı Pərviz zərərçəkmişi aldatmadığını və narkotik maddə verdiyini deyərək bununla bağlı söyüş söyüb. Lakin Novruzbəy onun sözü və söyüşlərinə inanmayıb və təqsirləndirilən şəxsin söyüş söydüyünə əsəbiləşib sifətinə bir neçə sillə vurub. Sonra Novruzbəy üzərindən bıçağı çıxarıb ona göstərib. Pərviz isə bundan əsəbiləşərək üzərində gəzdirdiyi bıçağı çıxarıb onun döş qəfəsi nahiyəsinə qəsdən bir dəfə zərbə endirib. Hadisədən sonra Pərviz Ağayev saxlanılaraq cinayət məsuliyyətinə cəlb edilib.
Sumqayıt Ağır Cinayətlər Məhkəməsinin hökmü ilə o, 7 il müddətinə azadlıqdan məhrum edilib. Sumqayıt Apellyasiya Məhkəməsinin qərarına əsasən, şikayət təmin edilməyib.
