Saray qəsəbəsində uzun müddətdir ki, yol yararsız vəziyyətdədir. Bu haqda 19 aprel tarixində Sumqayıt24 xəbər verir.
Söhbət Mikayıl Müşfiq küçəsindən gedir. Sürücülər iddia edirlər ki, bu yoldan mütəmadi istifadə etdiklərindən hər ay avtomobillərini təmir etməyə məcbur olurlar.
“Küçənin, demək olar ki, heç bir salamat yeri yoxdur. Bu hal uzun zamandır ki, davam edir. Sürücü və piyadalar üçün əsl cəhənnəmə çevrilən ərazini palçıqsız təsəvvür etmək mümkün deyil”, - deyə sakinlər söyləyiblər.
İctimai TV qəsəbə bələdiyyəsinə küçə və ətraf yolların nə vaxt təmir olunacağı ilə bağlı sual ünvanlayıb. Qurumdan bildiriblər ki, “Azərsu” ASC tərəfindən təxminən 1 həftədir ki, ərazidə müəyyən işlər aparılır. İşlər 20 gün ərzində tamamlandıqdan sonra küçədə asfaltlanma işlərinə başlanılacaq.
