Sumqayıtda yeni Boks Təlim Mərkəzi fəaliyyətə başlayıb. Sumqayıt24 bu haqda 3 noyabr tarixində Azərbaycan Boks Federasiyasına (ABF) istinadən xəbər verir.
Mərkəz ABF-nin dəstəyi ilə Mehdi Hüseynzadə adına stadionda tikilib. Ümumi sahəsi 1441 kv.m-dir və 3 mərtəbədən ibarətdir. Burada bufet, mətbəx və qeydiyyat otağı yer alır. İkinci mərtəbədə məşq zonası, sauna, 2 paltardəyişmə otağı və məşq üçün bütün idman ləvazimatları var. Məşqçi, həkim, masaj otaqları və trenajor zalı isə üçüncü mərtəbədə yerləşir. “Gənclik şəhəri”nin boksçuları artıq ilk məşqlərini keçiriblər.
Boks Təlim Mərkəzinin direktoru Şahin İmranov bildirib ki, Boks Təlim Mərkəzində 12 məşqçi çalışacaq. Hazırlığa isə eyni anda 25-30 yeniyetmə qatıla biləcək.
O, ilk məşqin yüksək səviyyədə keçdiyini vurğulayıb:
“Hazırlığa yeni başlasaq da, Sumqayıtda boksa maraq yüksəkdir. İlk məşqdə yeniyetmələr arasında Avropa və dünya mükafatçıları da iştirak ediblər. Onların hər biri yaradılan şəraitdən razı qalıb”.
Direktor idman ocağının tezliklə ölkə idmanına böyük fayda verəcəyini deyib. Mərkəz yığmanın da bazası olacaq. Burada klublar da təlim-məşq toplanışı keçə biləcək.
