“Sumqayıt” klubunun baş məşqçisi “Qarabağ” üzərindəki qələbədən danışıb. Sumqayıt24 bu haqda 23 may tarixində xəbər verir.
Xəbər verdiyimiz kimi, Premyer Liqanın 35-ci turu çərçivəsində “Azərsun Arena”da keçirilən səfər oyunundan komandamız 3 xalla dönüb (1:2). Matçdan sonra Samir Abasov öz fikirlərini bölüşüb:
“Komandamı təbrik edirəm. Oyunlar paralel olaraq gedirdi. Öz oyunumuz qədər digər matçlar da vacib idi. Digər oyunlardakı nəticələr də bizi liqada saxlaya bilərdi. Amma xoş olan odur ki, “Qarabağ”ı məğlub etməklə öz hesabımıza Premyer Liqada qaldıq. O biri komandalara ümid etmədik. Futbolçularımı, azarkeşlərimizi təbrik edirəm. Bir oyunumuz qalıb, ona da hazırlaşacağıq. Həmin matçı keçirib daha sonra planlarımızı quracağıq. Əsas məqsədimiz Premyer Liqada qalmaq idi. Allaha şükürlər olsun ki, öhdəsindən gəldik”.
Qeyd edək ki, “kimyaçılar” turnir cədvəlində 31 xalla 7-ci yerdə qərarlaşıblar.
