“Sumqayıt” futbol klubunda ikili oyun gedir. Bu barədə 16 may tarixində Futbolinfo.az xəbər yayıb.
Komandanın menecer-prezidenti Riad Rəfiyev klubları ilə müqaviləsi bitən futbolçuların böyük hissəsinə xəbər göndərib. Yerli oyunçuları milli komandaya cəlb etdirəcəyi ilə şirnikləndirir, əcnəbilərə isə daha yaxşı klub tapacağı vədini verir. Bu işlər görülərkən də baş məşqçi Samir Abasovun istəkləri nəzərə alınmır.
Lakin Abasovun da öz siyahısı var. O, Aydın Bayramovu yola salaraq, yerinə Mehdi Cənnətovu (“Zirə”) gətirmək niyyətindədir. Maraqlısı odur ki, Rəfiyev məşqçinin daim tənqid etdiyi Bayramova yeni müqavilə təklif edib.
“Sumqayıt”da prezidentin gətirdiklərini Abasov oynatmır,onun seçdiklərini isə Rəfiyev incidir. Ümumiyyətlə, onlar arasında münasibətlər normal deyil. Prezident hər dəfə uğursuzluq yaşanan kimi qeyri-rəsmi söhbətlərdə Abasovu özünün seçmədiyini, tapşırıqla götürdüyünü deyir. Buna baxmayaraq, Riad bəyin gətirdiyi Aleksey Baqanın səhvlərini hazırda məhz Abasov “düzəldir”.
